-Дауны хам шинжийг хүүхэд төрөхөөс өмнө оношлох боломжтой-

-Дауны хам шинжийг хүүхэд төрөхөөс өмнө оношлох боломжтой-

Сүүлийн үед манайд ургийн гаж хөгжилтэй, Дауны хам шинж буюу биеийн хромосомын эмгэгтэй хүүхэд олон төрөх болсон. Энэ нь эцэг, эхчүүд төдийгүй эмч мэргэжилтнүүдийн санааг зовоож буй. Энэ тухай Эх хүүхдийн эрүүл мэндийн төвийн Хүүхдийн эмнэлгийн Нярайн эрчимт эмчилгээний тасгийн их эмч
С.Энхтуяагаас асуулаа.

-ЭХЭМҮТ-ийн Нярайн эрчимт эмчилгээний тасагт ямар өвчтэй хүүхдүүд хэвтэж эмчлүүлдэг вэ?
-Манай нярайн эрчимт эмчилгээний тасагт гол төлөв төрөлхийн гаж хөгжил, мэс заслын өвчнүүд, тархины цус харвалт зэрэг хүнд өвчтэй хүүхдүүд хэвтдэг. Ихэвчлэн сэхээн амьдруулах эрчимт эмчилгээ шаардлагатай хүүхдүүд байдаг.

-Сүүлийн жилүүдэд ургийн гаж хөгжилтэй, Дауны хам шинжтэй хүүхэд цөөнгүй төрж байна гэх болсон. Танай тасагт ийм хүүхдүүд хэр их хэвтэж эмчлүүлж байна вэ?
-Манай тасагт хэвтэж эмчлүүлж байгаа хүүхдүүдийн судалгаанаас үзэхэд сүүлийн гурван жилд ур-гийн гаж хөгжлөөр эмчлэгдэж байгаа хүүхдийн тоо нэмэгдсэн. Манай "Эх хүүхдийн эрүүл мэндийн үндэсний төв"-д Удамзүйн эмч нар ажиллаж, энэ талаарх нарийвчилсан судалгааг хийдэг. Энэ судалгаанаас үзэхэд манай улсад 800-1000 хүүхэд тутмын нэг нь Дауны хам шинжтэй төрж байна. АНУ-д ийм өвчтэй хүүхэд 4000 төрөлтөд нэг тохиолддог гэсэн судалгаа байдаг.

-Дауны хам шинжийг биеийн хромосомын эмгэг гэдэг юм билээ. Удамшлын гаралтай өвчин үү?
-Дауны хам шинж гэдэг нь бэлгийн Эсийн буруу хуваагдлаас болж хромосомын тоо өөрчлөгдсөнтэй холбоотой биеийн болон оюуны хомсдлын өвчин юм. Энэ нь удамшлын шинж чанартай өвчин. Үүнд тодорхой эмчилгээ байдаггүй. Ийм өвчтэй хүүхдийн өсөлт нь үеийнхээ хүүхдүүдээс ямагт хоцорч байдаг. Гэхдээ нийгмийн болон боловсролын талаас нь сайн дэмжээд өгвөл ийм хүүхэд нийгэмтэйгээ харьцаад амьдрах чадвартай. Дээд тал нь 50-60 насалдаг.

-Ийм хүүхэдтэй айлд дахиад хромосомын эмгэгтэй хүүхэд төрөх үү?
-Хромосомтой холбоотой олон эмгэг байдаг ч Дауны хам шинж нь хамгийн түгээмэл тохиолддог нь юм. Гэхдээ нэг айлд дахиад ийм хүүхэд төрөх магадлал бага. Харин дараагийн удамд нь байж болно. Тиймээс эдгээр хүмүүсийг эрсдэлтэй бүлэгт хамруулж авч үздэг. Тэгэхээр хромосомын эмгэгтэй хүүхэдтэй эцэг, эхчүүд дахин жирэмслэхдээ удам зүйн эмчээс зөвлөгөө авах хэрэгтэй.

-Энэ өвчнийг хүүхэд төрөхөөс өмнө оношилж болдог уу?
-Сүүлийн үед манай ЭХЭМҮТ-д эхо оношилгооны 3D, 4D аппаратууд ирсэн. Эдгээр аппаратаар оношилох боломжтой. Жирэмсэн эхчүүд 10-14 долоо хоногтойгоос эхлээд эхо шинжилгээ, оношилгоонд хамрагддаг. Энэ үед ургийн гаж хөгжл үүд байж болох кретирүүдийг эмч нар эход сайн харах хэрэгтэй.

Тухайлбал хүүхдийн шилэн хүзүүний нугалаасны зузаан, дунд чөмөгний урт, зүрхний хэмжээ анх харснаас хэр өөрчлөгдсөн байна. Зүрхний гажиг байна уу гэх мэтийг харах нь чухал. Дауны хам шинж нь аль ч ястан үндэстэнд адилхан шинж чанартай тохиолддог. Тиймээс эхчүүд жирэмсний үед дөрвөн удаа 10-14 долоо хоног, 20-24 долоо хоног, 30-32 долоо хоног, 36-37 долоо хоногтойд эход заавал харуулах ёстой.